الروح والطين

الروح والطين


شگد غُفت روحي عله برد الطين؟
ياخذها الهوى مندايه..
وترجع للهوى مندايه
تنزف للشجر ويخضّر الزيتون
ياساس الحزن بالروح.. خضر ياحزن زيتون
وأنذر كل غصن للدنيه، للانسان
وأنزف كل فرح يامنبع الأشجار
وأنزع كل قهر مر بيك.. مر بيه
وأضحك للجرح.. للريح.. للأزهار..
للنجمه الربيعيه!
شگد غُفت روحي عله برد الطين؟
يطگ بيه الحزن وألتم
يطگ بيه الفرح وألتم
أذوب من الغنه.. ياريح طارّيك
يذوّب كل قهر بيه
ينديني،
يغسل كل جرح بيه
يخاويني
يفزز كل لحن بيه
يغنيني سهار الليل تجليبه وأبوذيه
وأمر بالناس، بالبارات، بالشارع
وذوب من الغنه وللگاع اغني الماي
أسيل بكل سواجي الناس
أجدد كل سواجي الناس
أفيّض بكل سواجي الناس
وأسهر للفجر، للصبح، للآذان..ليليه!