فد يوم اكو ملك لوتي راح للسوك يتفقد التجار
طلب اغنى 3 تجار بالسوك ولما أجوي كاللهم تعالوا وياي للقصر وعندي الكم سؤال اللي يجاوب عليه أنطيه 150 ليرة ذهب واللي ميعرف ينطيني 300 ليرة
راحوا التجار وياه للقصر ومن وصلوا دخل لغرفة مربوط بيهه مطي وطلب من التاجر الاول أن يدخل للغرفة
دخل التاجر الاول وسأله الملك : شنو هذا المربوط ؟؟
جاوب التاجر: مولاي هذا مطي
الملك كال : لا انت غلطان هذا بعير ، انطيني 300 ليرة لان انت معرفته
طلع التاجر الاول من الغرفة يحجي وي نفسه ، سأله الثاني : شبيك ؟ كاله : الملك سكران رابط مطي ويكول عليه بعير من يسألك هذا شنو؟ كله بعير
دخل التاجر الثاني وسأله الملك : شنو هذا المربوط ؟؟
ضحك التاجر وجاوب : مولاي هذا بعير
الملك صار عصبي وكال : انت غبي ؟؟؟ متشوف هذا مطي . شلون تكول بعير ؟ . انطيني 300 ليرة لان معرفته
طلع التاجر الثاني هم يحجي وي نفسه ، سأله الثالث : يبين الملك دوخكم ؟ جاوبه : إي والله حرنا وي الملك انكله مطي يكول بعير .. انكله بعير يكول مطي معرفنه شيريد؟
دخل التاجر الثالث وسأله الملك : شنو هذا المربوط ؟؟ لو هم متعرف مثل ربعك ؟؟
جاوب التاجر : مولاي القبلي معرفوا هذا شنو ؟؟ بس آني أعرفه
الملك كاله : كول شنو ؟
جاوبه التاجر : هذا لا مطي ولابعير . هذا طركاعة وطاحت على راسنة
أتمنى تعجبكم
أخوكم
مصطفى البغدادي
